İstifadə şərtləri

1.Ümumi müddəalar

Bu İstifadə şərtləri («Şərtlər») xdigital («biz») ilə xdigital.az saytından, müştəri portalından və ya xidmətlərimizdən istifadə edən şəxs («siz») arasındakı münasibətləri tənzimləyir.

Xidmətləri göstərən: Fərdi sahibkar Nəsibli Aydın Vaqif oğlu, VÖEN 1309635092, Bakı şəhəri, Yasamal rayonu, Zahid Xəlilov küçəsi, Məhəllə 586, Mənzil 15, Azərbaycan Respublikası.

Saytdan istifadə etməklə, portalda hesab yaratmaqla və ya xidmət sifariş etməklə bu Şərtləri qəbul etmiş olursunuz. Razı deyilsinizsə, xidmətlərimizdən istifadə etməyin.

Şirkət adından hərəkət edirsinizsə, həmin şirkət adından bu Şərtləri qəbul etməyə səlahiyyətiniz olduğunu təsdiqləyirsiniz. Portal hesabı yalnız 18 yaşına çatmış şəxslər üçündür.

2.Anlayışlar

• Portal — xdigital.az saytındakı müştəri paneli. Sifarişlər, mesajlar, fayllar, düzəliş və dəstək sorğuları burada aparılır.
• Paket — vebsayt abunəliyinin səviyyəsi: Başlanğıc, Biznes, Premium və ya Fərdi təklif.
• Yazılı təklif — işin həcmini, qiymətini, ödəniş qaydasını və müddətini göstərən, portal və ya e-poçt ilə göndərdiyimiz təklif.
• İş günü, iş saatı — Bakı vaxtı ilə bazar ertəsindən cüməyədək, 09:00–18:00. Azərbaycan Respublikasında qeyri-iş günü elan edilən bayram və istirahət günləri iş günü sayılmır.

3.Xidmətlər

• Vebsayt hazırlanması — aylıq abunəliklə (paketlər üzrə) və ya birdəfəlik ödənişlə. Abunəlikdə saytın hazırlanması, hostinq, SSL, texniki dəstək və paketin aylıq düzəliş kvotası qiymətə daxildir.
• Meta reklam idarəetməsi — Instagram və Facebook reklamlarının qurulması, idarə olunması və hesabatlar, aylıq idarəetmə haqqı ilə.
• Rəqəmsal həllər — avtomatlaşdırma, idarə panelləri və fərdi tətbiqlər, rezervasiya sistemləri, CRM, süni intellekt inteqrasiyaları və fərdi proqram təminatı. Hər layihə yazılı təkliflə, aylıq abunəliklə və ya birdəfəlik ödənişlə hazırlanır.

Paketlərin tərkibi və qiymətləri müvafiq xidmət səhifəsində göstərilir. Konkret layihənin həcmi, nəticələri və müddəti sorğunuz təsdiqlənəndə müəyyən edilir. Saytdakı ümumi məlumatla sizə göndərdiyimiz yazılı təklif arasında fərq olarsa, yazılı təklif əsas götürülür.

4.Sifariş və razılaşmanın bağlanması

Sorğunu portal, saytdakı formalar və ya e-poçt vasitəsilə göndərirsiniz. Sorğunu nəzərdən keçirir, lazım olduqda əlavə suallar verir, sonra sizə işin həcmi və qiyməti ilə yazılı plan və ya təklif göndəririk.

Sorğu göndərməyiniz və sorğunu qəbul etməyimiz hələ razılaşma deyil. Razılaşma yazılı planı və ya təklifi qəbul etdiyiniz andan bağlanmış sayılır. İş ilk ödəniş daxil olduqdan sonra başlayır.

Elektron ticarət haqqında Qanuna əsasən razılaşma bağlandıqdan sonra 7 iş günü ərzində səbəb göstərmədən ondan imtina edə bilərsiniz. İş bu müddətdə sizin razılığınızla başlayıbsa, bu hüquq tətbiq olunmur: yazılı planı qəbul edərkən işin ilk ödənişdən dərhal sonra başlamasına razılıq verirsiniz.

Bu Şərtlərə və ya qanunvericiliyə zidd olan sorğunu qəbul etməyə bilərik.

5.Qiymətlər və ödənişlər

Qiymətlər Azərbaycan manatı (₼) ilə müvafiq xidmət səhifəsində və ya yazılı təklifdə göstərilir. Qiymətlərə bütün vergilər daxildir.

Hər ödəniş üçün hesab müştəri portalının «Ödənişlər» bölməsində açılır və e-poçtunuza göndərilir. Hesabı bank kartı ilə Epoint-in təhlükəsiz ödəniş səhifəsində ödəyirsiniz. Kartınızın tam nömrəsi bizdə saxlanılmır və kartınızdan avtomatik heç nə çıxılmır — hər ödənişi özünüz edirsiniz. Ödənişdən sonra qəbz e-poçtunuza göndərilir və portalda saxlanılır.

Vebsayt abunəliyi

• Aylıq ödənişdə ilk ödəniş 3 aylıq məbləğdir, sonrakı ödənişlər hər ay alınır. İllik ödənişdə 12 ay 10 aylıq qiymətə ödənilir.
• İlk ödənişlə ödənilən dövr ödəniş günündən sayılır və saytın hazırlanma vaxtı da bu dövrə daxildir. Məsələn, aylıq abunədə 1 martda ödəyib lazımi materialları da həmin gün təqdim etsəniz, sayt 1 aprelədək hazır olur, növbəti ödəniş isə 1 iyunda alınır. Materiallar gecikərsə, ödənilmiş dövr dayanmır: əlimizdə olanlarla işə başlayırıq, çatışmayanları gözləyərkən onlardan asılı olmayan işləri davam etdiririk.
• Saytın hazırlanması abunəliyə daxildir. Daha tez təhvil birdəfəlik əlavə ödənişlədir: sürətli təhvil (10 gün) — 1 aylıq, təcili təhvil (3 iş günü) — 3 aylıq paket qiyməti. Bu məbləğ ilk ödənişə əlavə olunur.
• Abunə olduğunuz paketin qiyməti abunəliyi ləğv edənədək sizin üçün dəyişmir. Paketi dəyişdikdə yeni paketin təsdiqlədiyiniz yazılı plandakı qiyməti tətbiq olunur.
• Paketi istənilən vaxt yüksəldə və ya endirə bilərsiniz. Yeni paket növbəti ödəniş günündən qüvvəyə minir. Paketi endirdikdə sayt yeni paketin həddlərinə uyğunlaşdırılır: limitdən artıq səhifələr, əlavə dillər və yuxarı paketin imkanları söndürülür. İllik ödənişdə ödənilmiş il bitənədək paketi endirmək olmur — yalnız yüksəltmək olar. İllik ödənişdə yüksəltmə növbəti ödəniş gününü gözləmir: ödənilmiş ilin qalan ayları üçün qiymət fərqini ödədiyiniz gün yeni paket qüvvəyə minir.

Birdəfəlik saytlar

Qəbul etdiyiniz yazılı təklifdəki qiymət və ödəniş qaydası ilə ödənilir. Təhvildən sonra hostinq, dəstək və düzəlişlər qiymətə daxil deyil, lazım olarsa, əlavə ödənişlə göstərilir. Təhvildən sonrakı 1 ay ərzində bildirilən xətaları pulsuz düzəldirik.

Rəqəmsal həllər

• Abunəlikdə ilk ödəniş 3 aylıq məbləğdir, sonra ödəniş hər ay alınır. Qiymətin sabit qalması, gecikmiş ödəniş, ləğv və mənbə kodu qaydaları vebsayt abunəliyində olduğu kimidir.
• Birdəfəlik layihədə qiymətin tamamı iş başlamazdan əvvəl ödənilir.

Meta reklam idarəetməsi

• İdarəetmə haqqı hər müştəri üçün ayrıca hesablanır: aylıq reklam büdcəsinin həcmi və kampaniyaların sayı nəzərə alınır. Haqq aylıq ödənilir.
• Reklam büdcəsi haqqa daxil deyil. Onu öz reklam hesabınızdan və kartınızla birbaşa Meta-ya ödəyirsiniz.

Qiymətə daxil olmayanlar

• Üçüncü tərəf xidmətlərinin haqlarını — süni intellekt istifadəsi, SMS, WhatsApp API, ödəniş sistemi, CRM və ödənişli tətbiqlər — birbaşa siz ödəyirsiniz.
• Hər vebsayt paketinə 1 korporativ e-poçt ünvanı daxildir: ilk ödəniş günündən Başlanğıc paketində 3 ay, Biznes paketində 12 ay pulsuzdur, sonra ayda 30 ₼ ödənilir. Pulsuz müddət bitməzdən əvvəl portalda soruşuruq: davam etsəniz, bu məbləğ aylıq ödənişinizə əlavə olunur; davam etməsəniz, ünvan pulsuz müddətin sonunda silinir. Premium və Fərdi təklif paketlərində abunəlik boyu pulsuzdur. Hər əlavə ünvan ayda 30 ₼-dir.
• Domeni sizin adınıza qeydiyyata alırıq. Abunəlikdə və birdəfəlik saytda ilk ilin domeni pulsuzdur (illik qiyməti 20 $-dək olan domenlər). Daha baha domendə fərqi və ilk ildən sonra domenin yenilənməsini siz ödəyirsiniz.
• Birdəfəlik rəqəmsal həllin işlədiyi server sizin kartınızla alınır və onun haqqını hostinq provayderinə birbaşa siz ödəyirsiniz. Serveri biz qururuq.

6.Hazırlanma və təhvil

Bütün paketlərdə sayt 1 ay ərzində hazır olur. Müddət ilk ödəniş daxil olduqdan və iş üçün lazım olan materiallar (şəkillər, loqo, lazımi girişlər və mətnlər; Premium paketində mətnlərin əvəzinə onları yazmaq üçün lazım olan məlumatlar — xidmətlər, qiymətlər, əlaqə) bizə təqdim edildikdən sonra hesablanır. Materiallar gecikərsə və ya işin həcmi razılaşmadan sonra dəyişərsə, müddət də müvafiq qədər uzanır.

Sürətli (10 gün) və təcili (3 iş günü) təhvil müddəti də eyni qaydada hesablanır. Kartla ödəniş üçün bankın təsdiqi və kənar xidmətlərin qoşulması kimi bizdən asılı olmayan addımlar bu müddətdən uzun çəkə bilər.

Dizayn hər paketə daxildir: hazır şablonlardan birini seçə və ya dizaynın sıfırdan hazırlanmasını istəyə bilərsiniz. Paketinizin dizayn düzəliş raundları çərçivəsində dəyişikliklər sayt işə düşənədək pulsuzdur; raundların sayı vebsayt səhifəsindəki müqayisə cədvəlində göstərilir. Sayt işə düşdükdən sonra tam redizayn və iri yeni sistemlər ayrıca qiymətləndirilir.

Rəqəmsal həllərin mərhələləri və müddəti yazılı təklifdə göstərilir. Birdəfəlik həll sizin serverinizdə qurulub təhvil verilir. Təhvildən sonrakı 1 ay ərzində hazırladığımız hissədəki xətaları pulsuz düzəldirik; sonrakı dəstək və dəyişikliklər əlavə ödənişlədir.

7.Düzəlişlər və dəstək

Abunəlikdə düzəliş sorğularını portal vasitəsilə göndərirsiniz. Paketinizin aylıq düzəliş kvotası qiymətə daxildir. Kvotanın həcmi vebsayt səhifəsindəki müqayisə cədvəlində göstərilir və portalda layihənizin səhifəsində görünür. Fərdi təklif paketinin kvotası sizinlə ayrıca razılaşdırılır; abunəliklə işləyən rəqəmsal həllərə Premium paketin kvotası şamil olunur.

• Bir sorğu bir işdir. Bir-biri ilə bağlı işlər ən böyük hissəsinə görə qiymətləndirilir; ayrı işləri ayrıca sorğu ilə göndərin.
• Mətnlər paketinizə görədir: Başlanğıc paketində hazır mətni siz verirsiniz, Biznes paketində lazım olsa redaktə edirik, Premium paketində yeni mətni biz yazırıq.
• «Limitsiz» kiçik düzəlişdə eyni anda ən çox 2 sorğu icrada olur; növbəti sorğu növbə gözləyir və müddəti iş başlayanda hesablanır.
• Yeni səhifə paketinizin səhifə limitinə daxildir. Kvota paketin həddlərini artırmır: limitdən artıq səhifə, əlavə dil və ya yuxarı paketin imkanları üçün paketi yüksəltmək lazımdır.
• Səhifə limitinə dil versiyaları, məhsul səhifələri, bloq yazıları və hüquqi səhifələr (məxfilik siyasəti, istifadə şərtləri, kuki siyasəti) daxil deyil: məsələn, 2 dildə 10 səhifəlik sayt 10 səhifə sayılır.
• Tam redizayn və iri yeni sistemlər kvotaya daxil deyil — ayrıca qiymətləndirilir.
• Sorğunun ölçüsünü işə başlamazdan əvvəl portalda bildiririk. Müddət ölçünü bildirdiyimiz andan hesablanır.
• Kvotadan artıq və ya kvotaya düşməyən iş üçün portalda ayrıca qiymət təklifi göndəririk. Təklifi qəbul etmədən iş başlamır.
• Kvota Bakı vaxtı ilə təqvim ayına aiddir; istifadə olunmayan kvota növbəti aya keçmir.

Xətalar

• Xəta — işləyən bir şeyin pozulması və ya istədiyinizdən fərqli hazırlanmasıdır. Sorğu göndərərkən növ olaraq «Xəta» seçin.
• Saytın və ya düzəlişin təhvilindən sonrakı 1 ay ərzində bildirilən xətaları pulsuz düzəldirik — kvotadan istifadə etmir. Bu müddətdən sonra xəta düzəlişinin həcmini (kiçik, orta və ya böyük) biz müəyyən edirik və o, kvotadan istifadə edir.
• Sorğunun xəta olub-olmadığına son qərarı biz veririk.
• Sayt açılmırsa və ya hostinq, SSL ilə bağlı problem varsa, Dəstək bölməsindən yazın — bu, kvotadan istifadə etmir.
• Abunəliklə işləyən rəqəmsal həllərdə xəta düzəlişləri abunəlik boyu daxildir; birdəfəlik həllər üçün «Hazırlanma və təhvil» bölməsindəki 1 aylıq qayda keçərlidir.

Dəstək sorğularına, saytdakı formalara və yeni sorğulara iş saatlarında cavab veririk. Məsələnin həlli onun mürəkkəbliyindən asılıdır.

8.Meta reklam idarəetməsi

• Reklam hesabı, biznes səhifələri və onlardakı məlumatlar sizə məxsusdur. İşləmək üçün bizə hesabınıza giriş verirsiniz və bu girişi istənilən vaxt geri ala bilərsiniz.
• Reklam büdcəsini siz müəyyən edir və birbaşa Meta-ya ödəyirsiniz. Xidməti göstərməyimiz üçün reklam büdcəsi ayda ən azı 500 ₼ olmalıdır.
• Reklam üçün şəkil və videoları siz təqdim edirsiniz. Reklam mətnlərini biz yazır, reklamları qurur və idarə edirik; vizual materiallar hazırlamırıq.
• Hər həftə qısa yeniləmə, hər ay tam hesabat göndəririk.
• Reklamlar Meta-nın reklam qaydalarına tabedir. Meta reklamı rədd edə və ya hesabı məhdudlaşdıra bilər; bu qərarlara görə məsuliyyət daşımırıq, amma məsələnin həllinə kömək edirik.
• Reklamın nəticəsi bazardan, təklifinizdən, büdcədən və Meta-nın alqoritmlərindən asılıdır. Ona görə müəyyən satış, müraciət sayı və ya nəticə qiymətinə zəmanət vermirik.
• Minimum müddət yoxdur: xidməti istənilən vaxt dayandıra bilərsiniz. Ödənilmiş ay geri qaytarılmır.

9.Müştərinin öhdəlikləri

• Doğru məlumat vermək, iş üçün lazım olan materialları və girişləri vaxtında təqdim etmək.
• Bizə verdiyiniz mətn, şəkil, video, loqo, ticarət nişanı və digər materiallardan istifadə hüququnuzun olmasını təmin etmək. Bu materiallarla bağlı üçüncü şəxslərin iddialarına görə məsuliyyəti siz daşıyırsınız.
• Saytınızda və reklamlarınızda yayımlanan məzmuna, təklif etdiyiniz məhsul və xidmətlərə, həmçinin saytınız vasitəsilə toplanan müştəri məlumatlarının qanuni emalına görə cavabdeh olmaq.
• Portal hesabınızın giriş məlumatlarını gizli saxlamaq və icazəsiz giriş şübhəsi yarandıqda dərhal bizə bildirmək.
• Ödənişləri vaxtında etmək.

10.Qadağan olunan istifadə

Xidmətlərimizdən və portaldan aşağıdakı məqsədlərlə istifadə etmək olmaz:

• qanunvericiliyə zidd olan və ya başqasının hüquqlarını, o cümlədən müəllif hüququnu və ticarət nişanını pozan məzmunun yayılması;
• aldadıcı reklam, dələduzluq, spam və ya zərərli proqram təminatının yayılması;
• portala, serverlərə və ya digər müştərilərin məlumatlarına icazəsiz girişə cəhd, sistemin işinin pozulması və ya həddindən artıq yüklənməsi;
• portal hesabının başqasına verilməsi və ya xidmətlərin razılığımız olmadan yenidən satılması.

Belə hallarda məzmunu yayımlamaqdan imtina edə, xidməti dayandıra və ya razılaşmaya xitam verə bilərik («Ləğv, dayandırma və xitam» bölməsinə baxın).

11.Əqli mülkiyyət və mənbə kodu

Bizə verdiyiniz materiallar (mətnlər, şəkillər, loqo, məlumatlar) sizə məxsus qalır. Onlardan yalnız sizə xidmət göstərmək üçün istifadə edirik.

Abunəlik dövründə sayt və ya rəqəmsal həll sizə xidmət kimi təqdim olunur; mənbə kodu təhvil verilənədək bizdə qalır. Abunəliklə hazırlanan saytın və ya həllin mənbə kodunu 12 aylıq abunədən sonra sorğunuz əsasında pulsuz təhvil veririk. Daha əvvəl lazım olarsa, 12 aylıq abunənin hələ ödənilməmiş hissəsini cari aylıq haqqınızla ödəyərək kodu təhvil ala bilərsiniz. Sürətli və təcili təhvil haqları bu hesablamaya daxil deyil.

Mənbə kodu ilə birlikdə saytın və ya həllin verilənlər bazasının nüsxəsini və yüklənmiş faylları (şəkillər, sənədlər) təhvil veririk. Quraşdırma təlimatı və saytın başqa hostinqə köçürülməsi təhvilə daxil deyil.

Birdəfəlik saytlar və birdəfəlik rəqəmsal həllər üzrə nəticələrin hüquqları ödəniş tam edildikdən sonra sizə keçir.

Təhvil verilən koda daxil olan və başqa layihələrdə də istifadə etdiyimiz ümumi komponentlər və alətlər bizdə qalır; onlardan həmin sayt və ya həll çərçivəsində müddətsiz və pulsuz istifadə edə bilərsiniz. Üçüncü tərəf materialları (şriftlər, stok şəkillər, açıq mənbəli kitabxanalar) öz lisenziyalarına tabedir.

Ayrıca razılaşma olmadıqda gördüyümüz işi portfoliomuzda və sosial şəbəkələrimizdə göstərə bilərik. Bunu istəmirsinizsə, bizə yazın.

xdigital adı, loqosu, saytın dizaynı və məzmunu bizə məxsusdur və icazəmiz olmadan köçürülə bilməz.

12.Məxfilik və fərdi məlumatlar

Fərdi məlumatlarınızı necə topladığımız və qoruduğumuz Məxfilik siyasətində, saytdakı kukilər isə Kuki siyasətində izah olunur.

Əməkdaşlıq zamanı bir-birimizə açdığımız qeyri-ictimai məlumatları — biznes məlumatlarını, girişləri və şifrələri — məxfi saxlayırıq və yalnız iş üçün istifadə edirik. Bu öhdəlik ictimaiyyətə açıq olan və ya açıqlanması qanunla tələb edilən məlumatlara şamil olunmur.

Hazırladığımız və ya idarə etdiyimiz sayt öz ziyarətçilərinin məlumatlarını (forma müraciətləri, sifarişlər) toplayırsa, həmin məlumatların sahibi sizsiniz. Biz onları yalnız sizin adınızdan və xidmət göstərmək üçün emal edirik.

13.Hostinq və xidmətin fasiləsizliyi

Abunəliklə işləyən saytlar və rəqəmsal həllər bizim hostinqimizdə yerləşir. Onların fasiləsiz işləməsi üçün çalışırıq, amma 100% fasiləsizliyə zəmanət vermirik: planlı texniki işlər, hostinq və domen provayderlərinin nasazlıqları, internet və ya elektrik kəsintiləri qısamüddətli fasilələrə səbəb ola bilər.

Abunəlik dövründə saytın ehtiyat nüsxələrini saxlayırıq. Bununla belə, vacib məzmun və məlumatların öz nüsxənizi saxlamağı tövsiyə edirik.

14.Məsuliyyətin məhdudlaşdırılması

Xidmətləri peşəkarcasına, vicdanla və razılaşdırılmış həcmdə göstəririk. Axtarış sistemlərindəki mövqe, satış, müraciət sayı və ya reklam nəticələri kimi konkret biznes nəticələrinə zəmanət vermirik.

Qanunun icazə verdiyi həddə:

• dolayı zərərə, əldən çıxmış gəlirə və ya işgüzar nüfuza dəyən zərərə görə məsuliyyət daşımırıq;
• üçüncü tərəf xidmətlərinin (Meta, hostinq və domen provayderləri, ödəniş sistemləri və s.) nasazlıqlarına və qərarlarına görə məsuliyyət daşımırıq;
• ümumi məsuliyyətimiz iddiadan əvvəlki 12 ay ərzində bizə ödədiyiniz məbləğlə məhdudlaşır.

Bu məhdudiyyətlər qəsdən və ya kobud ehtiyatsızlıqla vurulan zərərə, habelə qanunla məhdudlaşdırılması mümkün olmayan məsuliyyətə şamil olunmur. Bu Şərtlərin heç bir müddəası istehlakçı kimi qanunla sizə verilmiş hüquqları məhdudlaşdırmır.

15.Fors-major

Təbii fəlakət, müharibə, epidemiya, dövlət orqanlarının qərarları, geniş miqyaslı internet və ya elektrik kəsintisi, həmçinin iri infrastruktur provayderlərinin nasazlığı kimi tərəflərin nəzarətindən kənar hallarda heç bir tərəf öhdəliklərini vaxtında yerinə yetirmədiyinə görə məsuliyyət daşımır. Belə hallar davam etdiyi müddətdə öhdəliklərin icrası təxirə düşür; bu barədə bir-birimizə mümkün qədər tez məlumat veririk.

16.Ləğv, dayandırma və xitam

Abunəliyin ləğvi

Abunəliyi istənilən vaxt portal və ya e-poçt vasitəsilə bizə yazaraq ləğv edə bilərsiniz; əvvəlcədən bildiriş tələb olunmur. Ləğv etdikdə növbəti ödəniş alınmır, sayt və ya həll isə ödənilmiş dövrün sonunadək işləməyə davam edir. Artıq ödənilmiş dövr (o cümlədən ilk 3 aylıq və illik ödəniş) geri qaytarılmır.

Sayt və ya həll hələ hazırlanırsa və ya ödənişsizlik səbəbilə dayandırılıbsa, ləğv dərhal qüvvəyə minir; ödənilmiş məbləğ geri qaytarılmır.

Ödənilmiş dövr bitdikdən sonra saytınızı və məlumatlarınızı daha 2 ay saxlayırıq. Bu müddətdə abunəliyi bərpa edib saytı olduğu kimi geri qaytara və ya mənbə kodunu «Əqli mülkiyyət və mənbə kodu» bölməsindəki qaydaya əsasən təhvil ala bilərsiniz. 2 aydan sonra saytın faylları, məzmunu, verilənlər bazası, ehtiyat nüsxələri, həmçinin korporativ e-poçt ünvanları və onlardakı məktublar birdəfəlik silinir və bərpa edilə bilmir. Məktublarınızı bu müddət bitənədək yükləyib saxlayın.

Gecikmiş ödəniş

Abunəlik ödənişi 7 gündən çox gecikərsə, sayt və ya həll müvəqqəti dayandırılır. Dayandırma zamanı heç nə silinmir və ödənişdən sonra dərhal bərpa olunur. Bu imkan dayandırıldığı gündən 2 ay qüvvədədir. 2 ay ərzində ödəniş edilməzsə, abunəlik bitmiş sayılır, saytın faylları, məzmunu, verilənlər bazası, ehtiyat nüsxələri və korporativ e-poçt ünvanları birdəfəlik silinir və bərpa edilə bilmir. Silinmədən əvvəl mənbə kodunu eyni qaydaya əsasən təhvil almaq mümkündür.

Gecikmiş ödəniş ödəniş gününü dəyişmir: növbəti dövr əvvəlki ödənilmiş dövrün bitdiyi gündən hesablanır. Sayt və ya həll ödənişsizlik səbəbilə dayandırılıbsa, yeni dövr ödəniş günündən başlayır və bu gün yeni ödəniş günü olur — dayandırıldığı günlər üçün ödəniş alınmır.

Reklam idarəetməsi

Xidməti istənilən vaxt dayandıra bilərsiniz; ödənilmiş ay geri qaytarılmır. Dayandırdıqdan sonra reklam hesabınıza girişimiz bağlanır.

Bizim tərəfimizdən xitam

Xidməti 30 gün əvvəlcədən yazılı bildirişlə dayandıra bilərik. Bu halda tamamlanmış nəticələri və layihə fayllarını sizə təqdim edirik, ödənilmiş, lakin istifadə olunmamış dövrün haqqını qaytarırıq və mənbə kodunu pulsuz təhvil veririk. Bu Şərtlər ciddi pozularsa (qanunsuz məzmun, təhlükəsizliyə təhdid, portaldan sui-istifadə), xidməti əvvəlcədən bildiriş olmadan dayandıra bilərik.

Portal hesabınızın silinməsini portaldakı dəstək bölməsi vasitəsilə istəyə bilərsiniz.

17.Şərtlərdə dəyişikliklər

Şərtləri vaxtaşırı yeniləyə bilərik; səhifənin yuxarısındakı tarix son dəyişikliyi göstərir. Mövcud müştərilərə təsir edən əhəmiyyətli dəyişiklikləri qüvvəyə minməzdən ən azı 14 gün əvvəl e-poçt və ya portal vasitəsilə bildiririk. Yeni şərtlərlə razı deyilsinizsə, həmin tarixədək abunəliyi ləğv edə bilərsiniz. Abunə olduğunuz qiymət bu dəyişikliklərdən asılı olmayaraq ləğv edənədək sabit qalır.

18.Tətbiq olunan hüquq və mübahisələr

Bu Şərtlər Azərbaycan Respublikasının qanunvericiliyi ilə tənzimlənir. Mübahisəni əvvəlcə danışıqlar yolu ilə həll etməyə çalışırıq. 30 gün ərzində razılığa gəlinməzsə, mübahisəyə Azərbaycan Respublikasının qanunvericiliyinə uyğun olaraq məhkəmədə baxılır.

Şərtlərin hər hansı müddəası etibarsız sayılarsa, qalan müddəalar qüvvədə qalır. Portal və e-poçt vasitəsilə göndərilən bildirişlər yazılı bildiriş sayılır.

19.Əlaqə

Bu Şərtlərlə bağlı suallar üçün bizə yazın: info@xdigital.az. Portal müştəriləri dəstək bölməsindən də yaza bilər.

Telefon və WhatsApp: +994 10 334 51 51.

Rekvizitlər: Fərdi sahibkar Nəsibli Aydın Vaqif oğlu, VÖEN 1309635092, Bakı şəhəri, Yasamal rayonu, Zahid Xəlilov küçəsi, Məhəllə 586, Mənzil 15, Azərbaycan Respublikası.